Clic contra a soidade non desexada (2023)
IP: Renée DePalma
Outras persoas do equipo investigador: María Barba Núñez, Antía Domínguez Rodríguez, Isabel María Martínez Carillo
Entidade colaboradora: Fundación Esplai Cidadanía Comprometida
Entidade financiadora: Xunta de Galicia
Cantidade da financiación: por convenio entre Esplai / UDC
Inicios de 2023 nace a colaboración entre a Fundación Esplai Cidadanía Comprometida, que leva dende 1999 traballando pola inclusión social de colectivos vulnerables, e o grupo de investigación ECIGAL da Universidade da Coruña, que se dedica a promover e investigar a Educación para a Cidadanía Global (ECG) e outras educacións críticas e transformadoras.
Como parte do proxecto subvencionado pola Xunta de Galicia “Clic contra a soidade non desexada”, Fundación Esplai conta con ECG para levar a cabo unha investigación baseada en principios participativos. Coas persoas maiores, indagamos sobre como crear redes de apoio informais a través das Tecnoloxías da Información e a Comunicación (TIC) como forma de previr e abordar a soidade non desexada, unha tendencia especialmente preocupante entre persoas desta franxa etaria.
​
Queriamos situar ás persoas maiores no centro desta investigación, non só por ter en conta as súas demandas, senón permitindo que actúen na toma de decisións durante o proceso de indagación, así como no deseño de accións a reflectir nun documento final. Foi un elemento imprescindible para este proxecto xerar espazos de debate sobre estas cuestións, coa implicación de persoas maiores e axentes sociais, para o cal creamos un equipo de asesoramento que nos acompañou ao longo da investigación.
​
Os resultados están publicados na páxina web de Esplai, e está dispoñible tamén unha versión galega do informe.